Земјотрес со јачина од 7,8 степени ги погоди јужните Филипини, најмалку 15 лица загинаа, над 200 повредени

Најмалку 15 лица загинаа, а повеќе од 200 се повредени кога земјотрес со јачина од 7,8 степени ги погоди јужните Филипини рано утрово.

Земјотресот оштети згради и клучен пристапен мост во големиот јужен град Генерал Сантос и предизвика цунами од еден метар што ги погоди блиските брегови, соопштија официјални лица.

Филипинскиот претседател Фердинанд Маркос помладиот повика на претпазливост во областите склони кон цунами, а властите во Индонезија и Малезија исто така издадоа предупредувања за нивните блиски крајбрежни области.

Тихоокеанскиот центар за предупредување од цунами соопшти дека заканата од цунами во голема мера поминала околу пет часа по земјотресот, кој се случи во 7:37 часот по локално време, но ги повика луѓето да ги следат упатствата на локалните власти, бидејќи нивото на морето може да варира во наредните часови.

Земјотресот, најсилниот што ги погодил Филипините во 2026 година е регистриран во морето околу 13 километри југоисточно од Генерал Сантос, град со повеќе од 700.000 жители, кој е центар за преработка на туна и други комерцијални активности во јужниот филипински регион Минданао.

Филипинскиот претседател рече дека службите за одговор при катастрофи се подготвени и рече дека централната влада дејствува и нема да го напушти Минданао.

Бројот на жртви се искачи на 15, соопшти Филипинската канцеларија за цивилна одбрана.

Според Родриго Сосмења, директор на локалната канцеларија за цивилна одбрана, во регионот Сокссарген, кој ги вклучува провинциите Јужен Котабато, Султан Кударат и Сарангани, како и градот Генерал Сантос, пријавени се 12 смртни случаи.

Сосмења додаде дека најмалку 129 лица се повредени во регионот, додека спасувачките и службите за итни случаи продолжуваат да ја проценуваат големината на штетата и да бараат можни жртви.

Меѓународниот аеродром во Генерал Сантос беше привремено затворен поради земјотресот, а 17 домашни летови беа откажани, соопштија претставници на цивилното воздухопловство.

Филипинскиот институт за вулканологија и сеизмологија (Фиволкс) соопшти дека станува збор за силен земјотрес за кој се очекува дека предизвикал штета и дека оштетените згради веќе можат да се видат на видео снимки.

Фиволкс изјави дека вкупно 138 последователни потреси се регистрирани до 11 часот наутро по локално време по главниот земјотрес со јачина од 7,8 степени.

Американскиот геолошки завод исто така регистрираше последователни потреси со магнитуда од 6,5 степени. Според институтот, земјотресот е регистриран на длабочина од 55 километри.