Трамп: Воздушниот простор над и околу Венецуела ќе биде целосно затворен

Американскиот претседател Доналд Трамп денес соопшти дека воздушниот простор над и околу Венецуела ќе биде целосно затворен.

„Порака до сите авиокомпании, пилоти, дилери на дрога и трговци со луѓе: Ве молам, земете предвид дека воздушниот простор над и околу Венецуела ќе биде целосното затворен“, објави Трамп на својата социјална мрежа Трут соушл.

Администрацијата на Трамп е подготвена да воведе нови мерки за борба против трговијата со дрога, обвинувајќи го венецуелскиот претседател Николас Мадуро за улога во трговијата со дрога и шверцувањето дрога во САД, иако Мадуро негира каква било вмешаност.

Минатата недела, американските власти ги предупредија авиокомпаниите за „потенцијално опасна ситуација“ при летање над Венецуела поради „влошување на безбедносните услови и зголемена воена активност во или околу земјата“.

Досега, американските сили во регионот се фокусираа на поморски операции против дрога, а од септември имало најмалку 21 американски напад врз бродови за кои се сомневало дека превезуваат дрога низ Карибите и Пацификот, при што загинале најмалку 83 лица, објави Ројтерс.