Австриец уапсен на одмор во Италија, Интерпол 48 години го барал за убиство

Речиси половина век по злосторството, правдата го стигна 71-годишниот Австриец што беше уапсен во хотел во Италија за убиство извршено во 1977 година. Австриецот, како што е осомничен, заедно со својот татко убил човек во Египет пред 48 години, пишува австрискиот портал „Кроне“. Оттогаш е во бегство.

Приказната почнала во 1977 година, кога тогашниот 23-годишник бил вмешан во спор за земјиште со познаник на неговиот сега починат татко во Египет. Расправијата ескалирала и тие пукале во познаникот додека минувал пред нивната куќа.

По злосторството, младиот човек избегал во Австрија, каде што успешно се скрил, а подоцна дури и добил државјанство. Во меѓувреме, египетски суд го осудил во отсуство на пет години затвор, но пресудата била за нанесување телесни повреди со смртоносни последици. Врз основа на таа пресуда, за него била издадена меѓународна потерница, која останала во сила до денес.

Пензионерот очигледно заборавил дека Интерпол сè уште активно го бара преку таканаречената црвена потерница. Додека одморал на живописната Савонска Ривиера во италијанскиот регион Лигурија, се пријавил во хотел користејќи го својот пасош. Персоналот на хотелот веднаш ја известил полицијата, но бегалецот успеал да отпатува понатаму кон Шпанија пред доаѓањето на специјалната единица.

Сепак, само неколку дена подоцна тој направил фатална грешка – се вратил во истиот италијански хотел. Овој пат полицијата била подготвена, го нападнала и го уапсила.

Австриецот сега е во затворот Мараси во Џенова, каде што чека екстрадиција.