Одобрена продажбата на американски крстосувачки ракети на Украина

Вашингтон даде зелено светло за можна продажба на крстосувачки ракети воздух-земја на Украина.

Пакетот вреди околу 825 милиони евра, а Пентагон соопшти дека ќе содржи 3.350 ракети со муниција за напад со проширен ранг. Покрај ракетите, продажбата ќе вклучува ГПС-системи за водење, заштита од електронско војување, помошна опрема, софтвер за планирање мисии, резервни делови и техничка поддршка.

Според производителот, оружјето има дострел од „неколку стотици километри“.

Украинскиот претседател Володимир Зеленски месецов изјави дека Киев обезбедил 1,5 милијарди евра од европските сојузници за купување американско оружје.

Пентагон во соопштението рече дека продажбата „ќе ги поддржи целите на надворешната политика и безбедноста на САД со подобрување на безбедноста на земја-партнер, која е сила за политичка стабилност и економски напредок во Европа“.

Иако Стејт департментот на САД ја одобри продажбата, тоа сè уште не значи дека договорот е потпишан или дека преговорите се завршени.