Руте: Со засилување на своите напори во одбраната, ЕУ дава свој придонес за безбедноста
Во денешниот поопасен свет сите ние мора да го дадеме својот фер удел, па така и Европската Унија значително ги засилува своите напори во сферата на одбраната, порача генералниот секретар Марк Руте во обраќањето на денешното заседание на Северноатлантскиот совет на ниво на министри за надворешни работи, на кое учествуваше и високата претставничка на ЕУ за надворешни работи и безбедносна политика Каја Калас.
– Новата Бела книга на ЕУ за европската одбрана „Подготвеност 2030 година“ претставува голема пресвртница и сега со нетрпение ја очекуваме понатамошна тесна соработка во нејзиното спроведување. ЕУ, исто така, има за цел да одигра поголема улога во поддршката на Украина, додаде Руте.
Тој потенцира и дека континуираната посветеност на САД кон силна трансатлантска алијанса, останува основата на безбедноста на Европа и Северна Америка.
– Со нетрпение очекувам да разговараме за тоа како можеме дополнително да ја зајакнеме врската меѓу Европа и Северна Америка и да го претвориме НАТО во посилна, поправедна и поборбена Алијанса на нашиот Самит во Хаг, додаде Руте.
На министерската средба во Брисел учествува и министерот за надворешни работи и надворешна трговија Тимчо Муцински.
