Што можат интелигентните луѓе да очекуваат од животот? Научник дава интересен одговор 

Минатата недела на социјалните мрежи почна да се шири малку постара објава на поранешниот професор и научник Тони Касталдо, кој одговори на многу едноставно прашање на веб-платформата „Куора“.

Касталдо се осврна на некои вообичаени заблуди за интелигенцијата, за луѓето со висок коефициент на интелигенција и проблемите со кои се соочуваат високоинтелигентните луѓе, а голем број интернет-корисници се согласија со неговиот одговор и ги изнесоа проблемите со кои се соочиле притоа.

Прашањето беше: „Мојот коефициент на интелигенција е околу 151 според Менса. Што можам да очекувам да постигнам во животот?“

„Не очекувајте апсолутно ништо“

Касталдо даде одговор, а одговорот го пренесуваме во целост.

– Добре дојде во клубот! Можеш да очекуваш апсолутно ништо! Тоа е како да кажеш: „Имам мотор за тркачки автомобил, колку брзо можам да возам?“

Значи, пријателе, ти треба остатокот од твојот автомобил, а за жал, природата на твојот мотор нема секогаш да одговара со другите механички делови на твојот автомобил. Сите делови се случајно избрани и присилно споени.

„Остатокот од автомобилот“ во овој случај се физичките и емоционалните делови од вас, а со тестот за интелигенција докажавте дека сте способни брзо да решавате аналитички проблеми. Тоа не значи дека автоматски сте емотивно приспособени, ниту дека сте спортисти, не значи дека некој ќе ве сака или дека некого ќе сакате и не значи дека ќе заработите многу пари. 

Ова е нешто што ќе го научите низ годините. Можеби ќе ви биде потребно време, но сега ви давам совет за да препознаете некои работи: емоциите се сè и на крај ќе одлучат за вашата судбина. Разумот е слуга на вашите емоции и секогаш ќе биде.

Неокортексот се нарекува така затоа што се развил неодамна, пред тоа со нас владееја инстинкти, емоции и многу ограничена моќ на расудување. Како и кај другите животни. Во овој случај, еволуцијата не ни одзеде, туку ни додаде нешто ново. Пред неокортексот нашите инстинкти и емоции ги водеа нашите постапки и знаете што, тие и понатаму се на тронот.

„Случаен“ експеримент

Постои „случаен“ експеримент во кој бил вклучен човек кој ја изгубил својата амигдала (структура што служи за емоционално чистење). Резултатот бил дека човекот и понатаму бил рационален. Можел да решава математички задачи, бил добар во квизови и не го изгубил својот интелект. Но, бил онеспособен бидејќи не можел да донесува одлуки.

Ако му била дадена задача да избере облека за тој ден, тој би поминал часови пребарувајќи низ плакарот. Опишувајќи го она што го прави, тој бескрајно анализирал и наоѓал причини зошто сака да избере една кошула, а не друга, во зависност од тоа со кого би можел да се сретне, каде би можел да оди, какво би било времето, но никогаш не можел да донесе одлука.

Можеби мислите дека со текот на времето ќе му здодее или ќе се налути на изборот на кошули. Не. Тоа се емоции. Нему не му беше срам што толку долго избираше, не се мразеше себеси, не се грижеше. Сето тоа се емоции. Едноставно, ниту една кошула не му се допадна особено, па немаше рационална причина да ја одбере едната или другата. 

Фото: Freepik

Која е еволутивната улога на интелектот?

Интелектот е слуга на физичкиот и емоционалниот дел од вас и дава информации, проекции и предвидувања и ви овозможува да разберете на што ќе реагирате емотивно.

Зошто да останете на училиште кога емоционално би било позадоволувачки да се вработите и да заработите? Вашиот интелект ќе создаде две иднини. Во едната ќе имате поголеми шанси за подобра работа и подобар живот, а во другата краткорочно задоволство што ќе доведе до помалку работни места и потежок живот. И кога емотивно ќе ги разгледате опциите и ќе одлучите дека едната е подобра од другата, интелектот си ја заврши работата и вие останувате на училиште.

Мора да научите да се справувате со емоциите, да го одложувате задоволувањето, а вашиот интелект може да ви помогне во тоа, но истовремено тоа зависи од вашата моментална емоционална состојба. Интелектот може да ви помогне на училиште и на факултет. 

Академскиот успех е ваш и може да ви помогне да бидете финансиски успешни затоа што нашето општество му дава премногу вредност (буквално и преносно) на високото образование.

Но, вашите емоции можат сето тоа да го одвратат од вистинскиот пат. Менса го проучувала и овој проблем бидејќи не сите нивни членови се успешни или живеат среќен живот. Имаат членови кои станале зависници од дрога, биле жртви на измами, служеле затворски казни за импулсивни злосторства. Имале жени со висок коефициент на интелигенција, кои како импулсивни тинејџерки забремениле и се породиле на 15 години.

Членовите на Менса завршуваат како чувари, камионџии и работници во магацин. Членовите на Менса се борат со депресија и некои од нив извршиле самоубиство. Членовите на Менса имаат направено глупави потези и завршиле доживотно парализирани. Членовите на Менса стануваат дебели, имаат дијабетес и развиваат други болести бидејќи не можат да ја контролираат исхраната, депресијата или не можат да одолеат на нивните импулсивни искушенија.

И знаете што? Сите тие глупости се случуваат во иста мера како и кај другите луѓе што немаат толку висок коефициент на интелигенција.

„Емоциите управуваат со нашите животи“

Зошто? Затоа што емоциите владеат со нашите животи. Најдоброто што можете да го направите со вашиот интелект е да не се обидувате да ги контролирате вашите емоции. Она што можете да го направите со него е да манипулирате со емоциите, да научите како да бидете сигурни дека ќе го изберете најбалансираниот исход со краткорочни, среднорочни или долгорочни придобивки.

И не заборавајте дека вашиот интелект е слуга на вашите емоции. Не е таму да ги замени, туку да ги информира. Да ви помогне да избегнете краткорочно задоволство кога вашиот интелект ќе ја согледа можноста да ја саботира вашата долгорочна иднина. На тој начин ќе избегнете да паднете во замката да бидете животно и да страдате поради постапките на другите.

Извор: 6yka.com
Фото: Freepik