Шефицата на американската разузнавачка служба: Русија нема способност да ја окупира Украина
Шефицата на американската национална разузнавачка служба, Тулси Габард, изјави дека Русија нема ниту ресурси ниту реална способност да ја заземе Украина, а „уште помалку да ја нападне Европа“. Со изјавата таа директно реагираше на тврдењата на агенцијата Ројтерс дека претседателот на Русија, Владимир Путин, наводно не планира да запре на Украина и разгледува можност за напад на балтичките држави.
Габард ги отфрли ваквите тврдења како лажни, нарекувајќи ги „лаги и пропаганда“. Во објава на социјалната мрежа Икс, таа го обвини Ројтерс дека, како што изјави, „доброволно зборува во име на воените поттикнувачи кои сакаат да ги поткопаат напорите на претседателот Трамп да ја заврши оваа крвава војна која одзеде повеќе од милион жртви од двете страни“.
„Опасно е да се промовира лажен наратив за да се блокираат мировните напори на претседателот Трамп и да се поттикне хистерија и страв кај луѓето, за да се натераат да поддржат ескалација на војната, што НАТО и ЕУ навистина сакаат да ги вовлечат вооружените сили на Соединетите Американски Држави директно во војна со Русија“, напиша Габард.
Таа нагласи дека американската разузнавачка заедница им дала поинаква проценка за безбедносната состојба на креаторите на политиките, вклучувајќи го и демократскиот конгресмен Мајк Кигли од Комитетот за разузнавање на Претставничкиот дом, чии изјави беа пренесени од Ројтерс.
Според Габард, проценката на американските разузнавачки служби е дека Русија настојува да избегне директна и голема војна со НАТО.
„Дејствата на Русија на бојното поле укажуваат дека таа во моментов не може да ја освои и окупира цела Украина, а камоли Европа“, додаде таа.
Ројтерс претходно објави, повикувајќи се на шест извори запознаени со работата на американските разузнавачки агенции, дека Путин сè уште се стреми целосно да ја преземе Украина, и покрај јавните изјави за подготвеност за мировни преговори. Тие извори исто така тврделе дека Москва разгледува сценарио за напад на Латвија, Литванија и Естонија.
Ројтерс соопшти дека ваквите проценки се спротивни на јавните изјави на претседателот Доналд Трамп и неговите преговарачи, како и на тврдењата на Путин дека Русија не претставува закана за Европа. Агенцијата, исто така, потсети дека некои европски разузнавачки служби имаат слични ставови.
Конгресменот Мајк Кигли за Ројтерс изјави дека разузнавачките агенции, како што рече тој, „секогаш укажувале дека на Путин му треба повеќе“, алудирајќи на долгорочните цели на Кремљ во регионот.
