Фон дер Лаен: Секој пат кога има напредок во преговорите, Русија го ескалира насилството
Претседателката на Европската комисија (ЕК) Урсула фон дер Лаен денес во Стразбур ги истакна „црвените линии“ во преговорите за војната во Украина, велејќи дека ЕУ е против унилатерално прекројување на границите и ограничување на украинската армија, а се залага за финансиска поддршка на Киев од замрзнати руски средства.
„Планот на играта на Русија не се променил од почетокот на војната, таа верува дека може подолго да издржи од Украина, Европа и нивните сојузници, па затоа секој пат кога има вистински напредок во преговорите, го ескалира насилството“, рече Фон дер Лаен во Европскиот парламент.
„Го видовме ова и претходно, тоа е шема. Бучавата од Кремљ ги открива вистинските намери, за нив Украина останува само првиот чекор во многу поголема игра“, тврди претседателката на Комисијата. Германката ги поздрави напорите на американскиот претседател Доналд Трамп за мир во Украина и истакна дека работата на текстот на мировните преговори конечно започна, иако „сè уште е потребна многу работа“.
„Имаме почетна точка. Обединет фронт. Единствен глас“, рече таа. Фон дер Лаен посочи неколку „црвени линии“ што ЕУ не може да ги премине во преговорите. Алијансата не може да прифати ограничување на силите на Украина бидејќи тоа би ја направило ранлива на идна агресија, рече таа.
Претседателката на Комисијата нагласи дека не смее да има еднострано прекројување на границите, ниту нивна промени со сила, бидејќи ако ова се дозволи, „вратата се отвора за нови војни утре“.
Таа најави дека ЕК се подготвува да презентира правен текст за користење на руските замрзнати средства за финансиска поддршка и обнова на Украина.
„Да бидам јасна, не гледам никаков сценарио во кое европските даночни обврзници сами ја плаќаат цената за ова, тоа не е прифатливо“, нагласи таа. Во својот говор, германската политичарка исто така рече дека иднината на Украина е во Европската Унија, што не е само „прашање на судбината“, туку „клучен дел од секоја безбедносна рамка“.
