Фон дер Лаен презентираше план за вооружување на Европа со пет клучни точки 

Претседателката на Европската комисија Урсула фон дер Лаен денеска изјави дека новите планови на ЕУ за зајакнување на европската одбранбена индустрија и зголемување на воените капацитети би можеле да мобилизираат речиси 800 милијарди евра.

Зборувајќи на денешната прес-конференција, Фон дер Лаен најави дека ЕУ ќе предложи на земјите-членки да им се обезбеди поголем фискален простор за инвестиции во одбраната, како и 150 милијарди евра заеми за такви инвестиции, со мобилизација на приватен капитал.

„Потребно ни е големо зголемување на одбранбените капацитети, нема сомнеж за тоа. Сакаме траен мир, но траен мир може да се изгради само на сила, а силата започнува со зајакнување на самите себе“, рече таа. Таа додаде дека испратила писмо до европските лидери и наведе пет клучни точки од планот за повторно вооружување на Европа:

• Зголемување на јавното финансирање за одбраната – доколку земјите-членки ги зголемат трошоците за одбрана за 1,5% од БДП, тоа би можело да создаде фискален простор од речиси 650 милијарди евра во следните четири години.
• Нов инструмент кој обезбедува 150 милијарди евра заеми за одбранбени инвестиции на земјите-членки.
• Користење на буџетот на Европската Унија за одбранбени проекти.
• Мобилизирање на приватен капитал преку Синдикатот за штедење и инвестиции.
• Мобилизирање на приватен капитал преку Европската инвестициска банка.

Фон дер Лаен истакна дека овие планови би можеле да мобилизираат околу 800 милијарди евра за зајакнување на одбранбените и воените капацитети на Европа.

„Ова е клучен момент за Европа и ние мора да го искористиме“, рече таа.