УНХЦР повикува на итна деескалација на конфликтот меѓу Израел и Иран
Агенцијата за бегалци на Обединетите нации (УНХЦР) денеска повика на итна деескалација на конфликтот меѓу Израел и Иран, велејќи дека војната веќе ги принудува локалните населенија во двете земји да ги напуштат ранливите области.
-УНХЦР се придружува на генералниот секретар на ОН и другите лидери во повикот за итна деескалација на конфликтот меѓу Израел и Иран. Интензитетот на нападите веќе предизвикува движење на населението во двете земји, се вели во соопштението на веб-страницата на УНХЦР.
Се забележува дека се пријавени движења на населението од Техеран и други делови на Иран кон граничните премини кон други земји. Слично на тоа, иранските напади ги принудија луѓето во израелските градови да бараат засолниште на други места во земјата, а во некои случаи и во странство.
-УНХЦР ги повикува државите во регионот да го почитуваат правото на луѓето да бараат безбедност каде што е потребно и да им овозможат хуманитарен пристап на погодените. Агенцијата им се придружува на другите партнери на ОН во апелот за поштеда на цивилите и цивилната инфраструктура и во Израел и во Иран.
„Сега е време за деескалација“, се вели во пораката од високиот комесар на ОН за бегалци, Филипо Гранди, потсетувајќи дека регионот на Блискиот Исток веќе доволно страдал од последиците од војната, загубите и раселувањето. Предупредува дека секој ден на понатамошна ескалација на конфликтот може да предизвика дополнителни хуманитарни кризи во регионот кој веќе е оптоварен со милиони бегалци и внатрешно раселени лица.
