Уникатен подвиг на Словенците на ЗОИ 2026: Семејството Превц има дури четири члена со олимписки медали
Домен Превц освои злато во скијачки скокови, тимска конкуренција и им се придружи на својата сестра Ника и на браќата Петер и Цене, кои исто така имаат олимписки медали во истиот спорт. Ова е единствен случај во светот четири деца од исто семејство да освојат медали на ЗОИ
Со златниот олимписки медал на Словенецот Домен Превц во скијачки скокови, дисциплина мешан тим (заедно со Ника Водан, Анже Ланишек и Ника Превц), семејството Превц напиша посебно поглавје во историјата на Зимските олимписки игри. Браќата Петер, Цене и Домен и сестрата Ника станаа само второто семејство кое има четири различни освојувачи на медали на ЗОИ и првото кое има само браќа и сестри кои го постигнале овој подвиг.
Досега, само семејството Кришчан од САД успеало да го направи ова, каде што три браќа (Бил, Роџер, Гордон) и синот на Бил, Дејв, освоиле медали, сите во хокеј на мраз. Гордон бил првиот што го сторил тоа во 1956 година во Кортина Дампецо, по што четири години подоцна следеле Роџер и Бил (1960), а во 1980 година и Дејв Кришчан, синот на Бил.
До вчера немало таков случај во историјата на Зимските олимписки игри, браќа и сестри да освојат четири различни олимписки медали. Семејството Превц така стана единственото во кое три браќа и сестра освоија олимписки медал. Во случајот со семејството Кришчан, тоа е комбинација од браќа и син.
Родителите на Превц, Божидар и Јулијана, беа воодушевени од првиот олимписки медал кој го освои нивниот син Петер Превц. Во Сочи 2014 година, тој освои сребро и бронза во индивидуална конкуренција, а пред четири години во Пекинг 2022 година, освои злато во дисциплината мешан тим и сребро со машкиот тим.
Во Пекинг и Цене Превц освои медал во тимската дисциплина во скијачки скокови, но до оваа година семејството чекаше колекцијата да се прошири. Прво, Ника Превц скокна до сребро во поединечна конкуренција, а потоа Домен Превц беше член на тимот што освои злато во мешаниот тим на Словенија, во кој беше и Ника.
