Трамп: Цените на лековите ќе се намалат за 59 проценти. Исто така, кратиме и други трошоци 

Американскиот претседател Доналд Трамп планира денес да потпише извршна уредба за одредување на цените на лековите што се издаваат на рецепт, со која американските цени ќе се усогласат со цените во другите земји, а на социјалните мрежи објави дека тие ќе се намалат за 59 проценти.

Новата проценка на Трамп дојде откако вчера на социјалните мрежи објави дека ќе потпише извршна уредба за постигнување цена според принципот на најповластена нација, што би довело до намалување на цената од 30 до 80 проценти. Трамп не ги објави деталите за својот план.

Во Соединетите Американски Држави, цените на лековите што се издаваат на рецепт честопати се до три пати повисоки од цените на истите лекови во други развиени земји. Во својот прв мандат, Трамп се обиде да ги доведе САД на ниво на другите земји, но судовите го спречија во тоа.

Производителите на лекови очекуваа регулатива насочена кон федералната програма за здравствено осигурување Медикер за лица над 65 години и лицата со попреченост, според четворица фармацевтски лобисти кои велат дека добиле информации од Белата куќа.

„Цените на лековите ќе се намалат за 59 проценти“, напиша Трамп со големи букви во објава на социјалните мрежи. Тој додаде дека ќе ги намали и цените на „горивото, електричната енергија, намирниците и сите други трошоци“. По коментарите на Трамп, акциите на глобалните фармацевтски компании се тргуваа по пониски цени, додека акциите на американските производители на лекови паднаа за 2 до 3 проценти.

За разлика од повеќето земји кои за цените по кои ќе купуваат лекови преговараат со компаниите, ваквите преговори во САД се ограничени. Досега, за цените на лековите наместо државата со приватните компании за управување со програмите за лекови на рецепт преговараа фармацевтски и осигурителни компании.

Законот за намалување на инфлацијата на поранешниот претседател Џо Бајден ѝ овозможи на државата да започне преговори за цените на најскапите лекови.

Но, цените за првите десет лекови кои државата тогаш ги договори беа во просек повеќе од двојно, а во некои случаи и пет пати повисоки, од цените договорени од фармацевтските компании во четири други земји со високи приходи, објави претходно Ројтерс.

На пример, најпродаваниот антикоагуланс Еликвис од Бристол Мајерс Сквиб на американската листа на лекови има цена од 606 долари месечно. Преку преговори, владата на Бајден успеа да ја намали таа цена на 295 долари месечно, што ќе се применува од 2026 година. Месечната залиха од истиот лек чини 114 долари во Шведска и 20 долари во Јапонија.