Трамп бара итно испраќање на Националната гарда во Чикаго, судот не му дозволува 

Федерален апелациски суд го отфрли барањето на кабинетот на американскиот претседател Доналд Трамп итно да одобри испраќање трупи на Националната гарда во државата Илиноис, потврдувајќи ја одлуката на понискиот суд со која привремено се блокираше мобилизацијата.

Федералниот апелациски суд ја потврди забраната за испраќање трупи, наведувајќи во краткиот судски налог дека членовите на Националната гарда од други држави кои моментално се стационирани во Илиноис засега не мора да се вратат во своите матични држави.

На почетокот на октомври околу двесте војници од огранокот на Националната гарда во Тексас пристигнаа во Илиноис. Американскиот претседател одобри испраќање 700 припадници на Националната гарда во Чикаго, најголемиот град во таа федерална држава, за кој Трамп тврди дека е „опустошен од војна“ и полн со насилство и криминал.

Американската судијка Ејприл Пери во четвртокот издаде наредба со која се блокира распоредувањето на трупи на Националната гарда, изразувајќи сомнежи за веродостојноста на обвинувањата од членовите на американската федерална влада, кои тврдат дека испраќањето трупи во Чикаго е неопходно за заштита на федералните агенти од насилни демонстранти.

Во друг случај судијката Карин Имергут ги блокираше напорите на американскиот претседател да испрати трупи во Портланд во сојузната држава Орегон.

Во двата случаи демократските гувернери на државата го тужеа Трамп, тврдејќи дека членовите на неговиот кабинет намерно ги прикажуваат претежно мирните протести против масовните депортации како насилни демонстрации за да оправдаат понатамошно распоредување на војската.

Налогот на судот во Илиноис останува на сила до 23 октомври, а судијата Пери може да ја продолжи.

Трамп, од друга страна, се заканува дека ќе ја прошири својата „воена кампања“ во други градови каде што демократите се на власт, откако веќе испрати војници на Националната гарда во Лос Анџелес и Вашингтон оваа година, и покрај противењето на нивните градоначалници.

Според пресудата на првостепениот суд во Лос Анџелес, испраќањето војници на Националната гарда во тој град било нелегално. Постапката во апелациониот суд сè уште е во тек.

Националната гарда е дел од американската армија и кога нејзините единици дејствуваат на територијата на Соединетите Американски Држави тие обично дејствуваат по наредба на гувернерите на федералните држави, кои ги испраќаат да помогнат во итни ситуации, како што се природни катастрофи.