Стармер: Нема да има златен билет за населување во Велика Британија, тоа мора да се заслужи 

Британскиот премиер Кир Стармер изјави дека нема да има „златен билет“ за трајно населување во Велика Британија, најавувајќи планови според кои бегалците ќе мора да го „заслужат“ правото долгорочно да останат во земјата.

Владата планира да го укине автоматското право на семејно обединување за оние на кои им е доделен азил во Велика Британија и да ги промени условите за долгорочно населување. Новите апликации за постојната програма за семејно обединување на бегалци беа суспендирани во септември.

Премиерот ќе разговара за овие планови, како и за соработката меѓу европските земји во справувањето со проблемот на нелегалната миграција, на денешниот состанок на Европската политичка заедница (ЕПЗ). „Населувањето мора да се заслужи со придонес за нашата земја, а не со плаќање на шверцер на луѓе да ве однесе преку Ламанш со брод“, рече Стармер.

Тој додаде дека Велика Британија ќе продолжи да прифаќа „вистински бегалци кои бегаат од прогон“, но дека мора да работи и против „факторите на привлекување“ кои ги поттикнуваат нелегалните преминувања во мали бродови. „Нема да има златен билет за населување во Велика Британија, луѓето ќе мора да го заслужат“, рече тој.

Стармер исто така на состанокот на ЕПЗ ќе најави ново партнерство за справување со основните причини за миграцијата во земјите од Западен Балкан, во соработка со данската премиерка Мете Фредериксен. Планот, кој ќе биде финансиран со до 3 милиони фунти, ќе вклучува охрабрување на луѓето да останат во регионот и да најдат работа таму.

Министерката за внатрешни работи на Велика Британија, Шабана Махмуд, ќе објави целосни реформи подоцна оваа есен, според кои бегалците ќе се соочат со подолг и потежок пат до постојан престој, заменувајќи ги сегашните пет години.

Мигрантите ќе мора да бидат вработени, а не приматели на социјална помош, да имаат високо ниво на познавање на англискиот јазик и чисто криминално досие. Тие исто така ќе мора да уплаќаат во Националното осигурување до одреден степен и да придонесуваат за општеството, на пример со работа во локалната заедница.

Советот за бегалци предупреди дека забраната за семејно обединување може да охрабри повеќе луѓе да се обидат да стигнат до Велика Британија преку шверцерски патишта, истакнувајќи дека визите за семејно обединување во голема мера ги користат жените и децата.

„Претходната влада безуспешно се обидуваше да ги обесхрабри луѓето да тргнат на опасни патувања со намалување на правата на бегалците по пристигнувањето, ограничувајќи го семејното обединување и можностите за населување“, рече Џон Фитонби, главен аналитичар во Советот за бегалци. Бројот на мигранти кои пристигнале во мали чамци во 2025 година надмина 34.000, што е рекорден број за овој период од годината. Преминувања преку Ла Манш се евидентираат од 2018 година.