Списанието Тајм аут го прогласи Стар мост во Мостар за најубав во светот
Списанието Тајм аут објави листа на деветнаесет најубави мостови во светот, првото место го освои Стар мост во Мостар, истакнувајќи ја неговата архитектонска убавина и силна симболика.
Списанието во своето објаснување нагласува дека убавината на мостовите не лежи само во нивниот дизајн, туку и во приказните што ги носат, за отпорноста, иновацијата, заедништвото и поврзаноста на луѓето и културите.
На врвот на листата, според изборот на списанието, Стар мост во Мостар гордо стои како глобален симбол на надежта. Тајм аут, во описот и историјат на Стар мост, потсети на неговото уништување за време на агресијата врз Босна и Херцеговина во 1993 година и неговата реконструкција и повторно издигнување над зелената река Неретва во 2004 година.
Исто така, наведено е дека препознатливиот мостарски камен лак денес е опишан во документите на УНЕСКО како симбол на помирување, меѓународна соработка и коегзистенција на различни културни, етнички и религиозни заедници.
На второ место на листата се најде „Двокатен мост со корени“ во Индија, единствен „жив мост“ исплетен од корените на дрво фикус во сојузната држава Мегалаја. Следен е челичен мост со сводови над реката Замбези, со поглед на прекрасните Викторини водопади.
Меѓу современите архитектонски атракции, се издвојуваат Златниот мост во Виетнам, препознатлив по монументалните камени раце што ја држат патеката, и мостот Хеликс во Сингапур, чија конструкција наликува на спирала на ДНК.
На листата се наоѓаат и светски познати класици како што се Бруклинскиот мост во Њујорк, Мостот кај пристаништето во Сиднеј и Мостот Сечењи во Будимпешта, кој ги поврзува Будим и Пешта преку Дунав.
Посебно внимание се посветува и на природните чуда како што се Ксианрен, најголемиот природен камен лак во светот во регионот Гуангси во Кина, како и традиционалниот Кесвачака во Перу, кој локалните заедници рачно го ткаат секоја година според древните техники на Инките.
