Синот на нарко-босот Ел Чапо се изјасни за виновен пред американски суд во замена за полесна казна 

Еден од синовите на мексиканскиот нарко-бос Хоакин „Ел Чапо“ Гузман, коосновач на картелот Синалоа, Овидио Гузман Лопез, се изјасни за виновен пред американски суд како дел од спогодбата што ќе му обезбеди полесна затворска казна.

Познат по прекарот „Ел Ратон“ (Глушец), 35-годишниот Овидио е единствениот од четирите сина на водачот на картелот кој постигна спогодба со американското судство и се изјасни за виновен. Неговиот татко, Ел Чапо, отслужува доживотна казна затвор во САД, изречена во 2019 година.

Американскиот обвинител Џеј Клејтон изјави во петокот на судот во Менхетен дека ова е „важен чекор во повикувањето на картелот Синалоа и неговите водачи на одговорност за нивната улога во епидемијата на фентанил, дрога што одзеде многу американски животи“.

Судот во Њујорк на 1 јули ги отфрли обвиненијата за трговија со дрога против Овидио Гузман како дел од спогодбата, избегнувајќи судење и обезбедувајќи, според аналитичарите, полесна казна од казната на неговиот татко. Датумот на изрекување на пресудата сè уште не е закажан.

Како дел од спогодбата, Овидио Гузман се изјасни за виновен за заговор поврзан со трговија со дрога и за учество во криминална организација, соопшти американското судство. Тој, исто така, призна дека тој и неговите тројца браќа ја презеле улогата на нивниот татко во рамки на картелот.

Овидио беше уапсен во јануари 2023 година во операција во Кулијакан, северозападно Мексико, во која загинаа најмалку 29 лица.

Тој беше екстрадиран во Соединетите Држави девет месеци подоцна.