Се бара пленарна седница да се види дали има 80 пратеници за уставни измени, па да се распушти Собранието 

Пратеникот Бојан Стојаноски од ВМРО-ДПМНЕ побара да се закаже пленарна седница со две точки на дневен ред. Тој потенцира дека ВМРО-ДПМНЕ гласаше против промена на Уставот, а за време на седницата на Комисијата за уставни прашања.

„Да се провери дали мнозинството има 80 пратеници или двотретинско мнозинството за уставни измени. Кога ќе се констатира дека нема, да преминеме на втората точка: распуштање на парламентот и одржување предвремени парламентарни избори“, напиша Стојаноски.

На Комисијата за уставни прашања експозе имаа сите претставници на политичките партии и премиерот Димитар Ковачевски. Пратениците од опозицијата гласаа „против“ дневниот ред и точките што се најдоа на Комисијата, а ВМРО-ДПМНЕ побара веднаш да се премине на гласање за уставните измени, без да се губи време. Ковачевски порача дека ова е историска шанса за Македонија и дека ако не се изгласаат измените – приказната за влез во ЕУ застанува.