Претседателот на Романија поднесе оставка

Романскиот претседател Клаус Јоханис најави дека ќе поднесе оставка во среда, по критиките дека останал на функцијата по поништувањето на претседателските избори одржани во декември.

„За да ги поштедам Романија и романските граѓани од кризата, ја напуштам функцијата во среда“, рече Јоханис во церемонијалниот говор во Букурешт.

Уставниот суд на Романија ги поништи претседателските избори во декември поради силни сомневања за руско мешање.

Судот изјави дека го поништува целиот процес за избор на романскиот претседател, а за да ја потврди валидноста и законитоста на изборите побара да се повтори целиот изборен процес.

Одлуката е донесена само неколку дена откако беа декласифицирани разузнавачки документи кои укажуваат дека Русија водела координирана онлајн кампања за промовирање на екстремно десничарскиот аутсајдер Калин Ѓорѓеску, кој, наводно, освоил најмногу гласови во првиот круг.