Поранешен претседател на украинскиот парламент убиен во Лвов  

Андриј Парубиј, украински политичар кој беше претседател на Врховната рада, украинскиот парламент, и одигра значајна улога во револуцијата Евромајдан, е убиен денес во Лвов, објави Киев индепендент.

На социјалната мрежа Икс беше објавено видео од моментот на убиството на Андриј Парубиј.

Националната полиција претходно соопшти дека политичар е убиен по пукање во западниот украински град. Ирина Херашченко, пратеничка од партијата Европска солидарност, подоцна потврди за Киев индепендент дека жртвата е Парубиј.

„Министерот за внатрешни работи Игор Клименко и главниот обвинител Руслав Кравченко штотуку ме информираа за првите познати околности на ужасното убиство во Лвов. Андриј Парубиј почина“, рече претседателот Володимир Зеленски.

„Се распоредуваат сите потребни ресурси за истрага и потрага по убиецот.“

Властите добија повик за итна интервенција околу пладне по пукање во јужниот градски округ Франкивски во Лвов, соопшти полицијата.

Жртвата починала на местото на настанот.

Службениците не коментираа за можни осомничени или за можен мотив за злосторството.

Во соопштението од Канцеларијата на генералниот обвинител на Украина се наведува дека се трага по сторителот на „намерното убиство“ на познатиот 54-годишен политичар.