Побогат за 146.000 евра: Компанија по грешка му платила на вработен 330 пати повеќе од неговата месечна плата, а тој дал отказ и избегал 

Неименуван работник од Чиле, на кој му било исплатено 330 пати повеќе од неговата месечна плата, дал отказ и на крајот ги победил своите поранешни работодавци на суд – откако тие се обиделе да си ги вратат парите, пишува „Дејли мејл“.

Човекот работел како асистент во прехранбената компанија „Конзорциум за индустриска храна од Чиле“ и заработувал околу 500.000 пезоси (околу 440 евра) месечно. Сепак, во мај 2022 година, 165 милиони пезоси, што изнесува приближно 146.000 евра, погрешно биле уплатени на неговата сметка.

Според компанијата, работникот се согласил да ги врати парите на состанок со одделот за човечки ресурси. Сепак, три дена подоцна, тој дал отказ и исчезнал, што предизвикало судска постапка што траела три години. Менаџерите го обвиниле за кражба, што е кривично дело за кое може да биде казнет или затворен до 540 дена.

Сепак, судијата одлучи дека не станува збор за кражба, туку за неовластено задржување на пари, што не спаѓа во кривично дело за кое може да се поведе постапка. Иако работникот е законски ослободен, компанијата сè уште се обидува да ги врати парите.

„Ќе ги преземеме сите можни правни чекори, вклучително и барање за поништување на пресудата, со цел да се овозможи нејзино преиспитување“, се наведува во соопштението на компанијата.

Овој необичен случај предизвика големо внимание во Чиле, но и низ целиот свет. Многу луѓе се прашуваат дали работникот е навистина виновен ако забележал грешка, дал отказ од работа и молчел?