Папата Лео: Храната не смее да биде оружје
Папата Лео денес упати итен апел до глобалните лидери да стават крај на гладот во светот, велејќи во говорот во седиштето на агенцијата на Обединетите нации дека да се дозволи милиони луѓе секојдневно да остануваат без храна е „морален пропуст“.
Посетувајќи го седиштето на Организацијата за храна и земјоделство (ФАО) во Рим, католичкиот лидер, исто така, ја осуди употребата на гладот како оружје на војната, но не именуваше конкретни конфликти или земји.
Лео ги цитираше бројките на ОН дека околу 673 милиони луѓе не јадат доволно секој ден, нарекувајќи ја бројката „јасен знак за преовладувачката нечувствителност, бездушна економија и неправеден и неодржлив систем на распределба на ресурсите“.
„Во време кога науката го продолжи животниот век, да се дозволи милиони човечки суштества да живеат и умираат страдајќи од глад е колективен неуспех, морален пропуст, историско злосторство“, рече папата.
Лео, првиот американски папа, голем дел од својата кариера пред папството ја помина како мисионер во Перу и ја стави грижата за сиромашните централна тема на својот петмесечен мандат.
Тој денес зборуваше пред околу 125 делегации кои присуствуваа на еднонеделниот форум што се совпадна со 80-годишнината од ФАО. Папата рече дека во денешните конфликти „храната повторно се користи како оружје на војната“.
„Меѓународното хуманитарно право, без исклучок, забранува напади врз цивили и врз стоки неопходни за опстанок на населението“, рече тој. „Се чини дека ова е заборавено бидејќи, за жал, сме сведоци на континуирана употреба на оваа сурова стратегија“, рече папата. „Не можеме да продолжиме вака, бидејќи гладот не е судбина на човештвото, туку негова пропаст“, рече тој.
