Папата Лео: Вештачката интелигенција треба да му служи на човекот, а не да го замени
Папата Лео ги предупреди политичарите за предизвиците кои ги претставува подемот на вештачката интелигенција (АИ), осврнувајќи се на нејзиното потенцијално влијание врз помладите луѓе како главна загриженост.
Зборувајќи на настан на кој присуствуваа италијанската премиерка Џорџа Мелони и парламентарни делегации од 68 земји, папата повторно се осврна на тема што ја покренуваше постојано во текот на првите неколку недели од неговото папство.
„Особено не смее да се заборави дека вештачката интелигенција функционира како алатка за благосостојба на човечките суштества, а не за да ги намали или дури да ги замени“, кажа Лео на настанот што се одржа како дел од римокатоличкиот јубилеј или Светата година.
Заговорниците на вештачката интелигенција велат дека таа ќе го забрза научниот и технолошкиот напредок и ќе им помогне на луѓето во извршувањето на рутинските задачи, давајќи им повеќе време да работат повредна и покреативна работа.
Папата роден во Соединетите Американски Држави кажа дека е потребно внимание за да се заштити „здравиот, праведен и правилен начин на живот, особено во корист на помладите генерации“.
Тој истакна дека „статичката меморија“ на вештачката интелигенција во никој случај не може да се спореди со „креативната, динамична“ моќ на човековата меморија.
„Нашите лични животи имаат поголема вредност од кој било алгоритам, а општествените односи бараат простори за развој што одат многу подалеку од ограничените обрасци што секоја бездушна машина може да ги подготви однапред“, рече тој.
Лео, кој стана папа во мај, претходно зборуваше за заканата што вештачката интелигенција ја претставува за работните места и ги повика новинарите да ја користат одговорно.
