Освежителен летен напиток од маточина, мед и лимон – природна поддршка за телото и умот 

Кога жештините нè притискаат и телото бара олеснување, често посегнуваме по нешто ладно и разладувачко.

Но, освен што сакаме нешто вкусно, сѐ повеќе од нас бараат и природни, здрави решенија за секојдневна хидратација. Еден од најдобрите летни напитoци што може да си го подготвиме дома е комбинацијата од маточина, мед, лимон и, по желба, свеж ѓумбир. Овој пијалак не е само освежителен, тој е и вистинска билна поддршка за телото и умот.

Зошто токму оваа комбинација?

Маточината е билка позната по своите смирувачки и антисептички својства. Таа помага при анксиозност, несоница, варење и го намалува нивото на кортизол – хормонот на стресот. Не случајно уште од дамнина се пиела во лето, кога жештината знае да го раздразни и најсмирениот дух.

Photo by Victor Serban on Unsplash

Лимонот, богат со витамин Ц и природни киселини, делува како лесен детоксикатор, го алкализира телото и ја поттикнува дигестијата. Освен тоа, неговата киселкаста свежина е совршен контраст на тревкастиот вкус на маточината.

Photo by Moritz Nie on Unsplash

Медот додава не само природна сладост, туку и антибактериски својства. Тој е богат со антиоксиданси и е одличен за имунолошкиот систем, а истовремено делува смирувачки на грлото – идеално ако сте поминале ден во правлив или климатизиран простор.

Photo by Benyamin Bohlouli on Unsplash

Ѓумбирот, ако се одлучите да го додадете, внесува нота на топлина и пикантност. Тој го стимулира метаболизмот, ја подобрува циркулацијата и делува антиинфламаторно. Особено е добар кога телото се чувствува тешко или надуено.

Photo by Mockup Graphics on Unsplash

Како да се подготви?

Во еден литар ладна вода, ставете:

• една рака свежи листови маточина (или 2-3 филтер кесички ако немате свежа),
• сок од еден свеж лимон (и по желба неколку тенки кругчиња лимон за декорација),
• 1-2 лажици мед (додадени откако чајот ќе се излади, за да ги зачува своите својства),
• неколку парченца свеж ѓумбир (по желба).

Маточината се попарува со врела вода (околу 300-400 мл), се остава да отстои 10 минути, па се процедува. Остатокот од водата се додава ладен или со мраз, и на крај се меша сè заедно со лимонот, медот и ѓумбирот. Оставете во фрижидер барем половина час пред консумација.

Кога и како да се пие?

Овој напиток е идеален за:

• утринско освежување, веднаш по будење – делува балансирано и подготвува органите за денот,
• попладневна пауза, кога се чувствувате мрзеливо или напнато,
• по физичка активност, бидејќи ја враќа хидратацијата и смирува телото,
• во вечерните часови, особено ако сакате нешто без кофеин што ќе ви помогне да се опуштите.

Не е потребен никаков шеќер, сè што ви треба е малку време и квалитетни состојки.