Обвинителство поднесе обвинение и против таткото на Васил Јованов 

Јавен обвинител од Основното јавно обвинителство Скопје поднесе Обвинителен предлог и против таткото на Васил Јованов, кој на 29 јануари годинава, управувајќи автомобил без возачка дозвола и под дејство на алкохол, удрил во пешакот Фросина Кулакова на булевар „Партизански Одреди“, која починала на лице место.

Јавното обвинителство на Македонија (ЈОРСМ), соопшти дека во текот на претходната постапка, јавниот обвинител обезбеди докази од кои произлегува дека обвинетиот, 50-годишен скопјанец за кривично дело – Предизвикување општа опасност, во периодот од 04.11.2022 до 30.01.2025 година со општоопасно дејствие предизвикал опасност за животот и телото на луѓето, свесен дека поради неговите сторувања можат да настапат штетни последици, а сепак лекомислено сметал дека тие нема да настапат.

– Тој на својот син му давал да управува патничко моторно возило „Пежо 207“, иако знаел дека синот не смее да управува со автомобил бидејќи нема возачка дозвола и е повеќекратен сторител на сообраќајни деликти, и тоа: едно кривично дело – сообраќајна несреќа со полесни последици во ноември 2022 година, 11 сообраќајни прекршоци (возење без возачка дозвола, возење под дејство на алкохол, непочитување на  семафор и на пешачки премин) во текот на 2023 и 2024 година, како и кривично дело – сообраќајна несреќа со смртни последици на 29.01.2025 година, се наведува во соопштението од ЈОРСМ.

ОЈО Скопје, претходно на 28 март година, по целосно спроведена истражна постапка, поднесе Обвинителен акт против Васил Јованов кое се товари за – Тешки дела против безбедноста на луѓето и имотот во сообраќајот од член 300 став 2 во врска со член 297 став 1 од Кривичниот законик, за кое е запретена максимална затворска казна до 20 години.