Новите откритија за Големата пирамида ја менуваат историјата: Научниците потврдија дека градителите не биле робови
Археолозите открија антички натписи во Големата пирамида (Кеопсова пирамида) во Гиза во Египет кои потврдуваат кој ја изградил пред 4.500 години.
Античките Грци рекле дека импресивната структура ја изградиле 100.000 робови кои работеле во тримесечни смени во текот на 20 години. Но, новите откритија во Големата пирамида покажуваат дека ја изградиле платени и квалификувани работници кои работеле континуирано, со слободни денови на секои десет дена, објавува „Дејли меjл“.
Нови откритија во Големата пирамида
Египтологот д-р Захи Хавас и неговиот тим неодамна истражуваа низа тесни простории над кралската комора користејќи напредна технологија за снимање, пронаоѓајќи претходно невидени ознаки оставени од работници од 13 век п.н.е. Покрај тоа, гробници на квалификувани работници се ископани јужно од пирамидата, со статуи што прикажуваат префрлање на камени блокови и 21 хиероглифска титула – вклучувајќи титули како „надзорник на страната на пирамидата“ и „занаетчија“.
„Овие откритија јасно потврдуваат дека градителите не биле робови. Да биле, никогаш немало да бидат погребани во непосредна близина на пирамидите, ниту пак ќе им било дозволено да ги подготвуваат своите гробови за вечноста, како што биле кралевите и кралиците“, рекол д-р Захи Хавас во подкастот „Мет Бил Лимитлес“.
Најновите откритија фрлаат дополнителна светлина врз тоа како е изградена пирамидата, откривајќи дека варовник од каменолом кој се наоѓа на само 300 метри оддалеченост бил транспортиран до градилиштето со помош на рампа направена од камења и кал, чии остатоци се пронајдени југозападно од самата пирамида.
Д-р Хавас моментално подготвува нова експедиција, финансирана од Мет Бил, која ќе испрати робот до Големата пирамида – првиот ваков археолошки потфат во модерната историја.
Големата пирамида во Гиза е најголемата египетска пирамида, изградена за фараонот Куфу, владетел на Четвртата династија на Старото Кралство. Таа е една од трите големи пирамиди, заедно со Пирамидата на Кефрен, Пирамидата на Менкауре и познатата Голема сфинга.
Сите овие структури се обвиткани во мистерија, поради нивните нејасни техники на градење, прецизни астрономски усогласувања и сè уште необјаснети цели.
Натписи во Големата пирамида беа откриени претходно во 19 век, што предизвика дебата за тоа дали натписите се фалсификати создадени стотици години подоцна.
Археологот покажа слики кои никогаш не биле јавно прикажани, покажувајќи истакнати имиња врежани во карпата.
„Тие беа пронајдени во простории до кои е тешко и опасно да се пристапи, а нивното точно толкување користи стилови на пишување што само обучени египтолози можат сигурно да ги прочитаат. Речиси е невозможно некој да фалсификувал вакви натписи во поново време. Мора да се искачите околу 14 метри и да ползите низ тесни премини за да стигнете до овие простории“, рекол д-р Хавас.
Покрај овие натписи, друго важно откритие се гробниците на градителите на пирамидите. Д-р Хавас и неговиот тим пронајдоа алатки во гробниците, како што се кремени алатки и камени чекани, кои биле користени за време на изградбата на Големата пирамида.
„Темелите на Големата пирамида се направени од цврст камен, врежан 8,5 метри длабоко во земјата. Ова значи дека откако ја обележале квадратната основа, градителите врежале камен од сите четири страни сè додека не создале рамна платформа од цврст камен, без блокови – само природен камен-темелник. Ова сè уште може да се види денес на јужната страна од пирамидата на Хуфу“, додал тој.
Тој објасни дека работниците работеле во тимови – некои го сечеле каменот, други го обликувале, а останатите го транспортирале материјалот на дрвени санки преку песокот. Тој исто така забележа дека камењата потоа биле преместувани со помош на рампи.
„Рампата сигурно започнала во југозападниот агол на пирамидата и се поврзувала со близок каменолом. Ја истраживме областа и ги откривме остатоците од рампата на локација означена со C2 – мешавина од камења, песок и кал. Кога рампата беше отстранета, тие не ги исчистиле целосно сите траги, а она што останало – го најдовме“, рекол д-р Хавас.
Соработникот на д-р Хавас, археологот Марк Ленер, ги води ископувањата на локацијата источно од пирамидата, позната како „град на работниците“. За време на ископувањата, откриени се објекти за сортирање солена риба, голема пекара за производство на леб, касарни и населба каде што живееле работниците.
