„Нема простор за паника за мајмунските сипаници во Македонија“, вели директорот на Инфективната клиника во Скопје

Директорот на Инфективната клиника во Скопје, доктор Фадил Цана се огласи за случајот со мајмунски сипаници во Косово и додаде дека во нашата држава нема простор за паника околу мајмунските сипаници.

– Кај нас нема. Запознат сум со случајот, имав долг разговор со директорот на Инфективната клиника во Приштина. Пациентот е стабилен, сѐ е под контрола во моментов – изјавил доктор Цана.

Според него надлежните имаат капацитети да се справат доколку и кај нас дојде оваа болест.

– Апсолутно сме подготвени во случај и кај нас да се појави лице со мајмунски сипаници. Може да се справиме со такви случаи. Имаме експерти, тоа е поле на Инфективна клиника, така што, болеста како болест ни е позната и сѐ што може да се преземе околу тоа, вели директорот на Инфективната клиника.

Преносот на мајмунски сипаници од човек на човек може да се случи преку контакт со заразен материјал од повреда или течности од кожата, устата или половите органи, вклучително и преку допирање, близок контакт и полова дејност. Може да се распространува и преку воздушен-капен пат при зборување, кашлање или кивање.