На ГП „Табановце“ влегле над 133 илјади граѓани, на ГП „Богородица“ излегле скоро 38.000 патници
Екот на туристичката сезона, празничниот викенд, враќањето на македонските граѓани кои работат во западноевропските држави, ги покажуваат и денешните податоци од Министерството за внатрешни работи за влез и излез од државата. На најфреквентниот граничен премин „Табановце во државата од 1 август до денеска до 10 часот вкупно влегле 133.165 граѓани, во истиот период излегле 73.640 лица.
– На граничниот премин „Табановце“ од 1 август 2025 од 10:00 часот до денеска, до 10:00 часот влез во државата оствариле 52.399 македонски државјани, а излез оствариле 27.690 македонски државјани. Што се однесува до странските државјани во истиот период влез во нашата држава оствариле 80.766 а ја напуштиле нашата држава 45.950, информираат за МИА од Министерството за внатрешни работи.
Оттаму велат дека во функција се ставени сите човечки и технички капацитети за да се забрза протокот на патници, со спроведување на задолжителните гранични проверки.
Наплив на патници е регистриран и на граничниот премин „Богородица“ кон Грција. Во истиот период (01.08.2025 од 10:00 часот до 03.08.2025 до 10:00 часот) влез оствариле 29.959, додека излез оствариле 37.806 патници.
– Влез во државата оствариле 11.472 македонски државјани а излез оствариле 16.011 македонски државјани. Што се однесува до странските државјани во истиот период влез во нашата држава оствариле 18.487 а ја напуштиле нашата држава 21.795, информираше МВР.
И на овој премин, МВР ги презема сите мерки и во функција се ставени сите човечки и технички капацитети за да се забрза протокот на патници, со спроведување на задолжителните гранични проверки.
МВР и останатите институции редовно ги постсетуваат возачите да внимаваат, да ги почитуваат правилата, прописите, да возат одморени, да прават паузи, да патуваат одморени, да внесуваат течности и безбедно да стигнат до саканата дестинација.
