Насилни протести во Тирана, демонстрантите фрлаа Молотови коктели на зградата на владата

Илјадници демонстранти од цела Албанија се собраа во Тирана на антивладин протест организиран од најголемата опозициска Демократска партија. Собирот пред зградата на владата на булеварот „Дешморет е комбит“ беше обележан со инциденти и тензии, јавува агенцијата Анадолу.

Организаторите бараат оставка од премиерот Еди Рама и од вицепремиерката Белинда Балуку, која е и министерка за инфраструктура и енергетика. Демократската партија наведува дека причината за протестот се корупциските случаи. Демонстрантите истакнуваат дека Балуку е обвинета за кршење на рамноправноста на учесниците во тендери и јавни аукции. Затоа Специјалното обвинителство за борба против корупцијата и организираниот криминал (СПАК) побара од парламентот да го одземе нејзиниот пратенички имунитет за да се овозможи нејзино апсење.

Претседателот на Демократската партија Сали Бериша се обрати на толпата, велејќи дека опозицијата исполнила неколку големи обврски кон граѓаните. „Демократската партија останува решена да соработува со секој фактор, со секој граѓанин и со секоја политичка сила на најширокиот фронт што Албанија некогаш го видела. Имајте доверба дека, исто како што ја спасивме опозицијата кога сакаа да ја уништат, така ќе ја спасиме и Албанија, ќе ги спасиме Албанците и ќе им го дадеме местото што го заслужуваат“, кажа Бериша. Тој ги повика сите опозициски сили да се обединат во борбата.

По говорот на Бериша, ситуацијата ескалираше. Избувнаа судири меѓу демонстрантите и полицијата, а неколку Молотови коктели беа фрлени врз зградата на владата. Накратко избувна пожар пред зградата, а во немирите беа повредени неколку лица.

Демократската партија и другите опозициски партии најавија дека ќе продолжат со протестите во наредните недели.