Над половина од светското население го чекаат екстремни горештини од најмалку 30 дена, велат научниците 

Научниците велат дека четири милијарди луѓе, речиси половина од светската популација, ќе претрпат „најмалку 30 дена“ екстремна топлина поради климатските промени од мај 2024 до мај 2025 година.

Екстремните горештини предизвикаа болести, смрт, загуби на земјоделски култури и ги оптоварија енергетските и здравствените системи на цели земји, се вели во извештајот на неколку организации, меѓу кои и Меѓународниот црвен крст.

„Иако поплавите и ураганите често доминираат во вестите, топлината е веројатно најсмртоносниот екстремен настан“, се вели во извештајот. Во речиси секоја земја во светот, бројот на деновите на екстремни горештини е најмалку двојно зголемен.

Топлинските бранови се тивки убијци, вели Фридерике Ото, професорка по климатски науки на Кралскиот колеџ во Лондон и една од авторите на извештајот. Сиромашните и ранливите популации, како што се постарите и оние со здравствени проблеми, се меѓу најтешко погодените од екстремните горештини.

Карипските Острови беа меѓу најтешко погодените, со дополнителни денови на екстремни горештини. Порторико, територија на САД, доживеа 161 ден екстремна топлина. Без климатските промени, ќе имаше само 48.

Високите температури забележани во Централна Азија во март, Јужен Судан во февруари и во Медитеранот минатиот јули немаше да бидат можни без климатските промени, се вели во извештајот.

Луѓето забележуваат дека температурите стануваат повисоки, но не секогаш знаат дека тоа се должи на климатските промени, рече Руп Синг, раководител на Центарот за урбанизам и атрибуција во Климатскиот центар на Црвениот крст.

Во извештајот се вели дека стратегиите за подготовка за топлинските бранови вклучуваат системи за следење и известување за екстремни температури, обезбедување здравствени услуги за итни случаи, нови градежни кодови, спроведување правила за безбедност од топлина при работа и дизајнирање градови за да бидат поотпорни на топлина.

Градските иницијативи за борба против екстремните горештини веќе станаа популарни во делови од Јужна Азија, Северна Америка, Европа и Австралија. Еден пример е иницијативата за садење дрвја покрената во Марсеј, јужна Франција, за да се создадат повеќе области под ладовина.

Но без постепено исфрлање на фосилните горива, топлинските бранови ќе продолжат да стануваат поинтензивни и почести, а мерките за заштита од топлината ќе ја изгубат својата ефикасност, велат научниците.