Милановиќ: Хрватска е во минус, без парите од ЕУ би била во бунар 

Претседателот на Хрватска Зоран Милановиќ изјави дека Хрватска „живее на долг“, дека е „во минус“ и дека без парите од Европската Унија, би „била во бунар“.

„Имавме неколку години позитивен платен биланс, сега повторно сме во минус. И не гледам излез од тоа со ваков вид политика. Да немаше европски дознаки, таа дупка ќе беше уште поголема“, кажа Милановиќ на свечената седница по повод Денот на градот Огулин, објави неговата прес-служба во соопштението.

Тој предупреди дека Хрватска денес „живее на долг“.

„Ние сме во минус, а без европските пари сме во бунар. А европските пари ќе доаѓаа само уште некое време. Европската Унија не е Америка, не може да печати евра како што сака“, додаде Милановиќ.

Тој предупреди дека парите од ЕУ нема да придонесат за конкурентноста и силата на хрватската економија, бидејќи тие пари се инвестираат главно во надградба, а не во производство.

„Речиси ништо од она што се финансира од фондовите на ЕУ не создава пари. Но, ние целосно ги отворивме нашите граници, странците прават што сакаат, произведуваат што сакаат, ни продаваат што сакаат без никакви ограничувања. Ова е предупредување дека сме во тешка конкурентска игра и ако утре се скараме, ќе дојде некој и ќе ни ги наплати долговите“, кажа хрватскиот претседател.

Затоа, додаде тој, е важно да се биде строг со финансиите, да се осигура дека ништо не недостига, но да не се живее од долгови без да се размислува како ќе се вратат.

Во својот говор, Милановиќ ја отфрли идејата за претворање на Европската Унија во „над-држава“, оценувајќи дека ЕУ не е империја, туку општество на национални држави, од кои секоја има свои особености.

Тој додаде дека по годините хрватско членство гледа дека значењето на членството е помош, финансиско олеснување на животот, трговијата, размена на идеи и живот во Европа без граници, иако, додаде тој, животот без граници е само навидум совршен, бидејќи има свои предизвици и проблеми.

Милановиќ истакна дека, за разлика од ЕУ, Хрватска е во НАТО „поради искуствата од последната војна, поради агресорите, поради Белград“, но „не за да оди во војна и да не генерира сили со цел да оди во војна“.