Како се случи големата катастрофа во Лос Анџелес: Санта Ана е виновна за се 

Научниците објавија дека „историските“ пожари што го зафатија Лос Анџелес, во кои загинаа најмалку пет лица, најверојатно се предизвикани во голема мера од ветровите на Санта Ана и климатските промени, а сигурно е дека силните ветрови го оневозможуваат гаснењето и ставањето на пожарите под контрола, објавија светските медиуми. 

Како се создаваат ветровите Санта Ана и од каде доаѓаат?

Клучниот фактор за формирање на ветровите на Санта Ана е специфичната временска конфигурација. Овие ветрови се случуваат со висок притисок над внатрешноста на западниот дел на Соединетите Држави, најчесто над регионот на Големиот басен кој опфаќа голем дел од Невада и делови од Јута, Ајдахо и југоисточен Орегон.

Овие области се главно суви и пустински, што значи дека ветровите што стигнуваат до Калифорнија доаѓаат без влага.

Додека ветровите кружат во насока на стрелките на часовникот околу системот за висок притисок, тие се движат кон југ и запад, кон Јужна Калифорнија, каде што се спуштаат преку планинскиот венец Сиера. За време на спуштањето, воздухот губи дополнителна влага и се забрзува. Брзината на ветрот дополнително се зголемува кога минува низ долини и клисури, слично како водата се забрзува додека минува низ црево.

Зошто се поврзуваат со пожарите во Јужна Калифорнија?

Ветровите од Санта Ана создаваат идеални услови за развој на шумски пожари, но тие често се одговорни и за размерите на уништување што го предизвикуваат пожарите.

Ниската влажност е клучна за палење на пожар. Воздухот првично е сув бидејќи доаѓа од пустински предели, но станува уште посув додека се спушта од планините.

Како фен за коса, овие ветрови ја сушат вегетацијата, што ја прави позапалива и овозможува брзо ширење на пожарите.