Израел им забрани на граѓаните летови од земјата 

Израел им забрани на своите граѓани да ја напуштат земјата по воздушен пат, наведувајќи безбедносни причини по ескалацијата на непријателствата со Иран, објавија блискоисточни медиуми.

Според израелскиот Хаарец, владата им наредила на домашните авиокомпании да ги спречат израелските граѓани да се качуваат на појдовни летови, поради растечките стравувања од можни ирански одмазднички напади врз израелските аеродроми.

Аеродромот Бен Гурион, главниот меѓународен аеродром во Израел, е затворен „до понатамошно известување“. Според Мидл Ист Монитор, одлуката наводно е донесена поради загриженоста на безбедносните службеници за ризикот од преголеми гужви и можни масовни жртви во случај на ирански напад врз аеродромите.

Израелската министерка за транспорт Мири Регев ја објави мерката, велејќи: „Во оваа фаза нема да дозволиме Израелците да патуваат во странство“. Таа објасни дека само странски државјани – како што се дипломати и туристи – моментално имаат право да ја напуштат земјата.

Регев, исто така, потврди дека владата подготвува операција за враќање на повеќе од 100.000 израелски граѓани кои моментално се во странство, ветувајќи дека процесот ќе се спроведува „постепено и плански“.

Сепак, одлуката предизвика критики. Бени Ганц, лидер на израелската партија Национално единство и член на воениот кабинет, ги осуди изјавите на Регев, пишувајќи на Икс дека не е работа на министерката да суди.

„Постара жена која чека операција; млада вдовица која го оставила своето дете во Израел да тагува само – ова се само две од илјадниците кои треба да се вратат дома. Вашата работа, министерке, не е да судите, туку да обезбедите нивно безбедно враќање.“

Ограничувањата за патување доаѓаат по израелскиот напад врз иранскиот аеродром во Машхад, што предизвика стравувања дека аеродромите сега би можеле да се сметаат за легитимни цели.