Зборуваше 25 часа и четири минути – американски сенатор го собори рекордот за најдолг говор досега

Американскиот сенатор Кори Букер го собори рекордот за најдолг говор одржан во Сенатот.

Демократот од Њу Џерси одржа маратонски говор, симболичен протест против американскиот претседател Доналд Трамп, во кој предупреди на „сериозен и итен“ момент во американската историја. Говорот траеше 25 часа и четири минути.

Иако тоа не беше говор дизајниран да блокира усвојување на закон, сепак ги запре законодавните активности во Сенатот контролиран од републиканците. Правилата за ваквите говори налагаат говорникот да остане на нозе и да не користи пауза за тоалет, јавува Би-би-си.

Претходниот рекорд го држеше републиканскиот сенатор Стром Турмонд, кој зборуваше 24 часа и 18 минути во 1957 година, противејќи се на Законот за граѓански права.

Букер рече дека ќе зборува онолку долго колку што може неговото тело да издржи, започнувајќи го говорот во понеделник вечер околу 19 часот по локално време, а заврши во вторник во 20:06 часот.

55-годишниот сенатор, кој е четврти по ранг меѓу демократите во Сенатот, дел од своето време го исполни читајќи писма од граѓани кои рекоа дека биле погодени од политиката на Трамп.

Поранешниот претседателски кандидат го искористи времето и да зборува за спорт, да рецитира поезија и да одговара на прашања од колеги.

Букер, кој има афро-американско потекло, зборуваше за своите корени како потомок и на робови и на сопственици на робови.

„Тука сум затоа што колку што е тој моќен, народот е уште помоќен“, рече тој, мислејќи на Турмондовиот рекорден говор пред 68 години.

Кога го достигна рекордот, Букер рече дека мора да одговори на „некои биолошки потреби што ги чувствува“.

За време на говорот, тој успеа да ја одмори вилицата така што слушаше прашања од колегите, меѓу кои и лидерот на малцинството во Сенатот Чак Шумер од Њујорк, сенаторот Дик Дурбин од Илиноис и сенаторката Кирстен Гилибранд од Њујорк.

Демократската партија, која моментално се наоѓа вон власт и во Белата куќа и во двата дома на Конгресот, застана зад симболичниот акт на протест на Букер.

Говорот на Букер е исто така најдолгиот во Сенатот од 21-часовниот говор дизајниран да го блокира усвојувањето на нацрт-законот од 2013 година, одржан од републиканскиот сенатор од Тексас, Тед Круз, против Обамакер.

Круз изјави за Си-би-ес дека говорот бил голем физички предизвик.