Железнички тунел под Алпите ќе ги поврзува Италија и Австрија

Работниците денес го пробија подземниот железнички тунел помеѓу Австрија и Италија кој ќе ги поврзува северот и југот на Европа.

Базниот тунел Бренер, кој кога ќе биде завршен ќе биде најдолгата подземна железничка врска во светот, е централен дел од планот на Европа за префрлање на товарниот транспорт од пат на железница за намалување на загадувањето и поттикнување на прекуграничната трговија.

„Денес, заедно, преземаме одлучувачки чекор за изградба на еден од најголемите инфраструктурни проекти на целиот континент. Ова е историски ден за Италија, за Австрија и за цела Европа“, кажа италијанската премиерка Џорџа Мелони на церемонијалното отворање на тунелот.

Тоа ќе биде првиот железнички тунел што директно ќе ги поврзува Австрија и Италија. Треба да биде отворен во 2032 година, со околу 16 години задоцнување, а ќе чини 8,5 милијарди евра, околу 2,5 милијарди повеќе од буџетот.

Тунелот ќе биде долг 55 километри кога ќе биде завршен, или 64 километри кога ќе биде поврзан со постојната подземна врска со Инсбрук. Тоа ќе го скрати патувањето помеѓу Фортеца во Италија до Инсбрук од 80 минути на помалку од 25.

Секоја година, повеќе од 2,5 милиони камиони, 14 милиони возила и 50 милиони тони стока го преминуваат превојот Бренер. Околу 70 отсто од трансалпскиот товарен транспорт поминува низ Бренер по пат, а само 30 отсто со железница.

Но, новата врска би можела да биде доведена во прашање од Германија, која не ги довршила клучните северни пристапни правци до тунелот Бренер.