ЕУ го зајакнува мандатот на Европол

Преговарачите на Советот и Европскиот парламент постигнаа прелиминарен договор за зајакнување на Европол за подобра поддршка на земјите-членки во борбата против криумчарење мигранти и трговијата со луѓе.

Посебно внимание се посветува на подобрување на размената на информации меѓу земјите-членки и Европол, со цел да се подобри соработката на ниво на ЕУ, соопшти Советот на ЕУ, додавајќи дека прелиминарниот договор треба да биде потврден од Советот и Парламентот пред да биде формално усвоен.

Новите правила наводно го менуваат мандатот на агенцијата на ЕУ, која им помага на националните органи за спроведување на законот во борбата против организираниот криминал и тероризмот.

Договорот предвидува и дополнителни човечки и финансиски ресурси – 50 вработени и 50 милиони евра, за спроведување на новите задачи на Европол.

Новите правила ќе ја зајакнат обврската за размена на информации за криумчарење мигранти и трговија со луѓе, како и формирање на Европски центар против криумчарење мигранти како постојана структура во рамките на Европол.

Центарот ќе обезбеди стратешка, оперативна и техничка поддршка на членките на ЕУ во спречувањето и борбата против криумчарење мигранти и трговија со луѓе.

Центарот, исто така, ќе игра улога во идентификувањето на жртвите на трговија со луѓе или други ранливи лица.

Офицери за врска треба да бидат испратени во Центарот и од агенцијата за гранична контрола Фронтекс и агенцијата за соработка во кривичната правда Евроџаст.

Се проценува дека повеќе од 90 отсто од илегалните мигранти кои пристигнуваат во ЕУ ги користат услугите на шверцерите, ОН сметаат дека мрежите на шверцери остваруваат годишен профит од 4,7 до 6 милијарди евра.