„Ер Франс“ и „Американ ерлајнс“ меѓу најпогодените авиокомпании откако „Ербас“ приземји над 6.000 авиони ширум светот
Откако европскиот авиопроизводител „Ербас“ информираше дека ќе мора да приземји околу 6.000 свои авиони ширум светот како последица од истрагата на еден неодамнешен инцидент покажала дека силната сончева радијација може да влијае врз компјутерите за контрола на летот, меѓу најпогодените од овој проблем се „Ер Франс“ и „Американ ерлајнс“.
Од компанијата велат дека повеќето летала ќе бидат вратени во употреба по кратко ажурирање на софтверот, но дел од постарите модели ќе останат на земја подолг период. пишува Ал Џезира.
Според „Ербас“, проблемот бил откриен за време на истрага за инцидент од минатиот месец, кога авион на „ЏетБлу“, на лет од САД кон Мексико, ненадејно изгубил висина и бил принуден да слета во Флорида. Најмалку 15 патници биле повредени.
Проблемот е лоциран кај дел од софтверот за пресметка на висината на авионите од семејството А320. „Ербас“ утврдил дека на големи надморски височини, податоците од овој систем може да бидат привремено нарушени од интензивната сончева радијација што повремено ја емитира сонцето.
Токму тоа довело и до октомврискиот инцидент со наглото губење на висина. Од „Ербас“ подвлекуваат дека ова е единствениот познат случај од ваков тип, но сепак се одлучиле за превентивно приземјување за да се гарантира безбедноста.
Покрај приземјувањето на најпродаваниот модел А320, проблемот се однесува и на авиони од сериите А318, А319 и А321.
За околу 5.100 авиони се очекува проблемот да се реши со стандардно софтверско ажурирање што трае околу три часа, а околу 900 постари авиони ќе треба подетална интервенција, односно физичка замена на компјутерските компоненти, што значи подолго приземјување.
„Ербас“ призна дека ова ќе предизвика значителни оперативни нарушувања за авиокомпаниите и патниците и упати јавно извинување.
Првичните информации покажуваат дека „Ер Франс“ е меѓу најпогодените компании – утрово биле откажани 50 летови до и од Париз. Во САД, „Американ ерлајнс“ соопшти дека 340 авиони се засегнати и дека се очекуваат одложувања.
Компанијата уверува дека процесот на ажурирање ќе се одвива брзо и дека најголем дел од авиони ќе се вратат во редовен сообраќај во краток рок.
