Добри вести од Софија: Сите пациенти од Кочани во „Пирогов“ се екстубирани

Сите пациенти кои беа примени во болницата „Пирогов“ во Софија по пожарот во Кочани се екстубирани, објави БНТ од извори од болницата.

Лекувањето на повредените продолжува и се чека долго закрепнување. Некои од децата носат маски за кислород.

Министерот за здравство Арбен Таравари на прес конференција во Скопје соопшти дека од вкупно хоспитализираните 21 пациент во Скопје по несреќата во Кочани, денеска ќе бидат пуштени пет. Четири пациенти се критични, кај двајца повторно е влошена состојбата. Се уште има и интубирани пациенти во тешка, но не и животно загрижувачка состојба, соопшти министерот за здравство Арбен Таравари.

Надвор од државата се 89 пациенти, но двајца се враќаат од Литванија и Шведска. Тие најпрво ќе бидат примени и прегледани во домашните болници од каде биле и испретени, според протоколот ќе бидат задржани 24 часа, а потоа ќе бидат пуштени дома.

За утре нема најава за враќање на други пациенти од странство, но во понеделник сигурно ќе се вратат пет.

-Од хоспитализираните, шест се во Клинички центар, шест во Градската болница и пет во ГОБ „8 Септември”, додека четворица се во приватните клиники. Денеска има пет исписи на пациенти кои се во подобра состојба и одат на домашно лекување по што ќе останат вкупно 16, кажа Таравари.