Десет најпосетувани градови во 2024 кои најмногу ги освоија срцата на туристите 

Компанијата за истражување на пазарот Euromonitor, од Велика Британија, ја објави листата на Топ 100 светски градски дестинации за 2024 година, а Париз четврта година по ред е прогласен за најатрактивен град во светот.

Градовите се оценувани според шест клучни фактори: Економски и деловни перформанси, туристичка инфраструктура, туристичка политика, здравје и безбедност, одржливост и целокупно искуство на посетителите.

Според овие показатели, Париз продолжува да биде лидер, благодарение на својот романтичен шарм, културно наследство и иконични знаменитости како иАјфеловата кула. Градот секоја година привлекува милиони посетители со своите музеи, гастрономија и богата историја.

Топ 10 градови во 2024 година според Euromonitor се:

Париз, Франција
Со својата елегантна архитектура, богата историја и светски познати музеи, како Лувр и Орсеј, Париз останува на врвот.

Мадрид, Шпанија
Познат по својата културна сцена, прекрасни плоштади и светски познати уметнички галерии, Мадрид е омилена дестинација за љубителите на историјата и уметноста.

Токио, Јапонија
Со комбинацијата на традиција и модерност, Токио привлекува туристи со своите храмови, футуристичка архитектура и уникатна гастрономија.

Рим, Италија
„Вечниот град” нуди неверојатно наследство, од Колосеумот и Пантеонот до Ватикан.

Милано, Италија
Модната престолнина на светот е и дом на импресивни историски знаменитости, како Миланска катедрала и Скала.

Њујорк, САД
„Градот кој никогаш не спие” продолжува да привлекува посетители со својата енергија, светски познатите атракции како Тајмс Сквер, Централ Парк и Музејот Метрополитен.

Амстердам, Холандија
Каналите, музеите како што се оние „Ван Гог“ и „Ријксмузеум“ и опуштената атмосфера го прават Амстердам незаменлива туристичка дестинација.

Сиднеј, Австралија
Сиднеј плени со својата природна убавина, Операта, и познатите плажи како Бонди.

Сингапур
Сингапур е познат по својата футуристичка архитектура, беспрекорна чистота и импресивни атракции како Marina Bay Sands и Gardens by the Bay.

Барселона, Шпанија
Градот на Гауди, со своите уникатни архитектонски дела како Саграда Фамилија и Парк Гуељ, продолжува да ги фасцинира туристите од целиот свет.

Европа доминира, но Азија се искачува

Иако европските градови се доминантни на листата, Токио и Сингапур докажуваат дека азиските метрополи имаат растечко влијание врз глобалниот туризам. Со уникатната мешавина на традиција, модерност и иновативност, овие градови ги освојуваат срцата на туристите.