Десетици илјади во Ватикан, Лео XIV го одржа својот прв говор: „Никогаш повеќе војна!“  

Папата Лео XIV во неделата ги повика светските лидери да ги запрат војните, особено во Украина и Појасот Газа, во говорот по својата прва неделна молитва како папа пред десетици илјади луѓе.

„Соочен со актуелното драматично сценарио на Трета светска војна во делови, како што папата Франциско неколку пати кажа, и јас се обраќам до светските лидери, повторувајќи го овој сè уште актуелен апел: никогаш повеќе војна!“ рече папата Лео XIV.

„Во срцето го носам страдањето на саканиот украински народ. Мора да се направи сè за што поскоро да се постигне автентичен, праведен и траен мир“, нагласи тој, повикувајќи на „ослободување на сите затвореници и децата да можат да се вратат кај своите семејства“.

Велејќи дека е „длабоко тажен од она што се случува во Појасот Газа“, Папата повика на „итен прекин на непријателствата, хуманитарна помош за исцрпеното цивилно население и ослободување на сите заложници“.

„Од друга страна, со задоволство ја дочекав објавата за прекин на огнот меѓу Индија и Пакистан и се надевам дека наскоро ќе се постигне траен договор“, рече тој.