Денеска се одбележува Светскиот ден на водата 

Светскиот ден на водата се слави секоја година на 22 март. Денот беше усвоен со резолуција на Обединетите нации во декември 1992 година, а официјално сеслави од 1993 година. 

Водата е основата за постоењето на живот на планетата Земја, а чистата вода за пиење и одржување на хигиената е неопходна за животот и здравјето.

Таа е од витално значење за намалување на глобалното оптоварување со болести и подобрување на здравјето, благосостојбата и продуктивноста на населението.

Сепак, правото на вода не е еднакво достапно за секого. Приближно 900 милиони луѓе во светот немаат пристап до чиста и здрава вода за пиење, додека 2,5 милијарди луѓе немаат нормални услови за одржување на својата хигиена.

Колку ни е важна водата?

Многу луѓе ја земаат водата здраво за готово, бидејќи е лесно достапна и воопшто не се грижат за тоа како и во колкави количини ја трошат, не знаејќи дека ако нема вода тогаш:

• Нема да постојат услови за одгледување на ниту една земјоделска култура.
• Нема да постојат соодветни услови за производство на храна.
• Нема да има индустрија.
• Нема да има луѓе.
• Планетата Земја нема да постои бидејќи водата во океаните е природен регулатор на температурата на Земјата.

Водата покрива две третини од површината на планетата Земја, сепак глобалната потрошувачка на вода сезголемува секоја година па не е достапна во изобилие како некогаш.

Што можете да направите за да придонесете за зачувување на водата?

• Не ја загадувајте околината и не фрлајте ѓубре во потоците, реките и езерата.
• Кога се туширате, исклучете ја водата кога не ја користите.
• Додека миете садови, нема потреба водата постојано да тече.
• Кога ги полевате цвеќињата и дворот, внимавајте на количината на вода која ја трошите.
• Обидете се да заштедите вода и исклучете ја чешмата секогаш кога водата тече непотребно.

Да ја вреднуваме и цениме водата!