ВУЧИЌ ОЧЕКУВА ПОБЕДА: Ќе има предвремени избори во Србија

Српскиот претседател Александар Вучиќ денеска изјави дека предвремените парламентарни избори би можеле да бидат распишани кога ќе завршат подготовките за изложбата Експо, која ќе се одржи во Белград во 2027 година, јави Танјуг.

Тој очекува победа на тие избори. 

„Го имаме Експото и мора да се подготвиме за Експото. Токму кога ќе ги завршиме подготовките за Експото, ќе одржиме предвремени избори, а на тие избори… се плашам дека направија голема грешка. Кога мислев дека шансите се тука, тие веќе ги нема, ќе ги добиеме убедливо дури и тогаш“, рече Вучиќ.

На прашањето дали може да им каже на граѓаните кога ќе завршат блокадите во Србија, тој одговори дека тие „во суштина завршиле, само што некои луѓе сè уште не го разбрале тоа“. Додаде дека тие не следат и не слушаат што зборува народот.