Венецуела уапси пет Американци, тензиите меѓу двете земји растат
Најмалку пет американски државјани се притворени од страна на венецуелските безбедносни сили во последните месеци, поради зголемениот притисок на Соединетите Американски Држави врз режимот на претседателот Николас Мадуро, потврди американски функционер запознаен со ситуацијата, пренесува Си-ен-ен.
Околностите на секое поединечно апсење се разликуваат, а функционерот наведува дека е можно некои од приведените да биле вклучени во шверц со дрога. Американските власти сè уште собираат информации за тоа што точно правеле во Венецуела во времето на нивното апсење.
Администрацијата на американскиот претседател Доналд Трамп верува дека режимот на Мадуро намерно ги приведува Американците за да ги користи како средство за притисок врз САД. Оваа тактика потсетува на онаа што ја користи Русија, долгогодишен сојузник на Венецуела, која во последните години притвори бројни Американци на своја територија за да ги користи во затегнатите односи со Вашингтон. Веста за неодамна приведените Американци првпат беше објавена од Њујорк тајмс, додека Стејт департментот и Белата куќа сè уште не го коментираа случајот.
Зголемен американски притисок
Иако претставниците на администрацијата на Трамп избегнуваат отворено да кажат дека бараат промена на режимот во Венецуела, тие го прогласија Мадуро за нелегитимен лидер и трговец со дрога. Притисокот врз неговиот режим се интензивираше во последните месеци, вклучително и со „блокадата“ на санкционирани танкери за нафта и други финансиски мерки.
Само во декември Стејт департментот воведе два пакета санкции против членови на семејството на Мадуро, а истиот месец САД го извршија својот прв напад врз копнена цел во Венецуела, кога беспилотно летало на ЦИА погоди пристанишна инфраструктура.
„Јасно е дека сегашниот статус кво со сегашниот венецуелски режим е неподнослив за САД“, кажа државниот секретар Марко Рубио за време на прес-конференцијата во декември, коментирајќи ја изјавата на шефот на кабинетот на Белата куќа дека Трамп „сака да продолжи да дига во воздух бродови сè додека Мадуро не признае пораз“.
Одговорот на Мадуро и ситуацијата во земјата
На прашање за нападот врз пристаништето, Мадуро кажа дека тоа „може да биде тема за која би можеле да разговараме за неколку дена“ и се обиде да ја увери јавноста дека Венецуела е безбедна земја.
„Она што можам да ви кажам е дека националниот одбранбен систем, кој ги комбинира народните воени и полициски сили, гарантира и продолжува да ги гарантира територијалниот интегритет, мирот во земјата и користењето и уживањето на сите наши територии“, рече Мадуро во интервју емитувано на државната телевизија. „Нашиот народ е безбеден и во мир“.
Во меѓувреме, активистите за човекови права предупредуваат дека Венецуела држи стотици луѓе како политички затвореници, од кои некои се притворени по спорните избори во 2024 година. Иако десетици луѓе беа ослободени од затвор во четвртокот, ниту еден од нив не беше Американец, потврди Алфредо Ромеро, раководител на организацијата за човекови права Форо пенал.
