Бајден помилува 39 луѓе и преиначи 1.500 казни 

Американскиот претседател во заминување Џозеф Бајден денеска објави дека помилувал 39 лица и ублажил речиси 1.500 казни.

Во соопштението Бајден вели дека помилувал 39 лица „што докажале дека се успешно рехабилитирани“ и дека им ја ублажил казната на речиси 1.500 луѓе што отслужувале долги затворски казни.

Белата куќа соопшти дека ова е најголемиот број милосрдни дела во еден ден и дека лицата чии пресуди биле преиначени најмалку една година ја отслужувале казната во домашен притвор.

Бајден рече дека САД се „изградени на можности и на втори шанси“ и додаде дека како претседател му е „огромна привилегија“ да покаже милост кон луѓето што покажале каење и се рехабилитирани.

Во почетокот на декември Бајден го помилува својот син Хантер, кој чекаше пресуда по обвиненијата за нелегално поседување оружје и затајување данок.

Бајден рече дека ќе продолжи да ги разгледува барањата за помилување. Тој е под притисок од разни групи да помилува голем број луѓе, вклучително и оние што чекаат егзекуција во федералните затвори, пред да му истече мандатот на 20 јануари.