Бајден одобри распоредување стотици американски војници во Сомалија

Одлуката е заснована на барањето на американскиот министер за одбрана Лојд Остин за подобро справување со заканите од Ал Шабаб.

Американскиот претседател Џо Бајден одобри распоредување на американски војници во Сомалија, поништувајќи ја одлуката на својот претходник Доналд Трамп минатата година да ги отстрани речиси сите сили што дејствуваа таму.

Белата куќа во понеделникот ја потврди одлуката на Бајден, која се заснова на барањето на американскиот секретар за одбрана Лојд Остин, објави Њујорк тајмс.

„Претседателот го одобри барањето на министерот за одбрана за повторно воспоставување постојано американско воено присуство во Сомалија за да се овозможи поефикасна борба против Ал Шабаб, која зајакна и претставува зголемена закана“, рече портпаролката на Белата куќа Карин Жан-Пјер.

„Ова е репозиционирање на силите што веќе се на бојното поле, кои повремено излегуваа и влегуваа во Сомалија откако претходната администрација донесе одлука да се повлечат“, рече Жан-Пјер.

Пред повлекувањето на Трамп, САД имаа околу 700 војници во Сомалија фокусирани на помагање на локалните сили да го поразат Ал Шабаб. Американската војска, исто така, повремено изведуваше напади во земјата и имаше војници во околните земји.

Њујорк тајмс цитира официјален претставник што вели дека одлуката на САД била одобрена во почетокот на мај и ќе вклучува распоредување на не повеќе од 450 војници. Официјален претставник изјави за Ројтерс дека ќе бидат помалку од 500.

Пентагон соопшти дека војниците нема да бидат вклучени во борба.

„Нашите сили ниту сега се, ниту некогаш ќе бидат директно вклучени во борбени операции“, рече портпаролот на Пентагон, Џон Кирби. „Целта тука е да се овозможи поефикасна борба против Ал Шабаб од страна на локалните сили“.

Овој потег доаѓа во време на зголемена загриженост за вооружената група во земјата, поврзана со Ал каеда, Ал Шабаб. Групата, која се обидува да ја собори владата и да воспостави сопствена власт во земјата, во последниве месеци освои некои територии од сојузната влада на Сомалија. Со тоа се поништи напредокот на мировниците на Африканската унија, кои некогаш ги турнаа вооружените борци во оддалечените области на земјата.

Веста за одлуката за распоредување дојде и откако Хасан Шеик Мохамуд, кој беше претседател на Сомалија меѓу 2012 и 2017 година, во неделата беше прогласен за победник на долготрајните избори.

Ал Шабаб често изведува бомбашки напади во Могадишу и на други места како дел од својата војна против централната влада на земјата на Рогот на Африка.

Во Сомалија имаше конфликти и клански битки без силна централна влада од падот на диктаторот Мохамед Сиад Баре во 1991 година. Владата има мала контрола надвор од главниот град, а контингентот на Африканската унија го чува во стилот на „Зелената зона“ во Ирак.