ФФМ потврди: Гоце Седлоски е нов селектор на Македонија
Фудбалската федерација на Македонија (ФФМ) го одбра Гоце Седлоски како нов селектор на македонската репрезентација, со него ќе ги водиме бараж битките за пласман на Светското првенство.
Како што и се претпоставуваше, Гоце Седлоски е наследникот на Благоја Милевски на кормилото на македонската репрезентација.
„Управниот одбор на Фудбалската федерација на Македонија (ФФМ) на денешната седница донесе одлука за избор на нов селектор на македонската А репрезентација. За нов селектор е именуван Гоце Седлоски.
Членовите на највисокото тело на ФФМ, одлуката за избор на нов селектор на македонската А репрезентација ја донесоа по предлог на Комисијата за избор на селектор, составена од Масар Омерагиќ – претседател на ФФМ, Горан Пандев – директор на Национални репрезентации, Николче Новески – раководител на Скаутинг службата на ФФМ, Агим Ибраими – член на Управниот одбор на ФФМ и Марјан Стојковски – потпретседател на ФФМ“, се вели во соопштението на ФФМ.
Засега нема официјална информација на колку години е потпишан договорот и дали ќе остане тренер на Вардар. Веројатно се работи за четиригодишен договор и паралелно ќе биде тренер и на црвено-црните до крајот на сезоната, а веројатно и на европските натпревари.
За утре од 11:30 часот е закажана прес-конференција на која ќе биде официјалната промоција на Гоце Седлоски за нов селектор и ќе бидат соопштени деталите.
