Ракометарките ќе играат за Кочани – РФМ ќе го донира приходот од мечот со Полска! 

Македонската ракометна репрезентација следниот викенд ќе одигра квалификациски бараж-натпревар против Полска за пласман на СП 2025, кој ќе има и посебно значење – ќе биде од хуманитарен карактер.

По подолго време репрезентативниот ракомет се враќа во Битола и салата „Боро Чурлевски“, во која што две сезони се играат натпревари од Лигата на шампионите, ќе биде домаќин на бараж натпреварот на женската селекција на Македонија против соодветната селекција на Полска.

Натпреварот е закажан за на дванаесетти април, а Ракометната федерација на Македонија објави дека билетите се пуштени во продажба. Продажната цена на влезниците за натпреварот кој е од хуманитарен карактер (средставата ќе бидат донирани за настраданите во Кочани) е 100 денари.

„Ракометната Федерација на Македонија ги известува љубителите на ракометот дека сениорската селекција во сабота (12.04.2025 г.), со почеток во 19:00 часот во спортската сала „ Боро Чурлевски “ во Битола, ќе го одигра квалификацискиот бараж натпревар во рамки на СП против селекцијата на Полска.

Продажбата на влезници за натпреварот започнува во петок на 04.04.2025 година во 12:00 часот online на интернет-страницата на МК Тикетс (https://mktickets.mk ) а влезници можат да се купат и на сите продажни места на МК Тикетс низ државата.

Продажната цена на влезниците за натпреварот кој е од хуманитарен карактер (средставата ќе бидат донирани за настраданите во Кочани) е 100 денари“, велат од РФМ.

Првиот натпревар меѓу двете селекции е закажан за на деветти април.