Камерите на „Безбеден град“ ќе регистрираат 4 прекршоци

Брзина над дозволеното, поминување на црвено светло, погрешно паркирање и запирање и нерегистрирано возило – ова се четирите прекршоци за кои „Безбеден град“ ќе ги казнува возачите, изјави синоќа за ТВ Сител Панче Тошковски, министерот за внатрешни работи.

Тошковски вели дека целта на „Безбеден град“ не е да казнува, туку да спаси човечки живот. „Целта е да ја зголеми безбедносната култура на граѓаните, а како последица на тоа да имаме колку што е можно помалку сообраќајни прекршоци, помалку повредени и колку што е можно помалку човечки жртви. Ќе се констатираат исклучиво четири прекршоци: брзина над дозволено, поминување на црвено, погрешно запирање и паркирање и нерегистрирано возило“.

Тој информира дека е утврдено дека бројот на сообраќајни прекршоци е најслабата алка.

„Почнавме од 100 000, а сега имаме драстично помалку сообраќајни прекршоци, но повторно тие се голема бројка од она кое реално може да се процесуира. Бројките и натаму се во илјадници, но се далеку помалку од оние на почетокот, како што беа 100 илјади.

Тој појасни дека мораат да ги достават до граѓаните сите оние докази за да ги убедат дека тие навистина го сториле сообраќајниот прекршок. Во споредба со претходно, сега граѓаните откако ќе го примат известувањето на телефон или маил ќе имаат можност да платат во рок од осум дена поливина од казната која е предвиедна, а онаму каде има забрана за управување моторно возило ако се плати во рок од осум или 16 дена тогаш забраната се изрекува на половина од минимумот кој е утврден законски. Според него, сето ова треба да ги мотивира граѓаните.

Министерот за внатрешни работи им се заблагодари на македонските граѓани, особено оние кои управуваат моторни возила на територија на СВР Скопје зошто, како што рече, докажаа дека овие месец и половина откако е почната употребата на „Безбеден град“ во т.н. тест период бројот на прекршоците е драстично намалени.

„Успеаја бројот на починати, како последица на непочитување сообраќајни правила, на територија на СВР Скопје да го намалат од 11 споредено со декември и јануари минатата година на два смртни случаи во декември 2025 и јануари 2026 година, заклучно со 20 јануари. Бројот на повредени лица, како последица на непочитување на сообраќајни правила, споредено за овие 50-тина дена со крајот на 2025 со почеток на 2026 година и крај на 2024 со почеток на 2025 година за истите месеци – декември и јануари е намален за 35 отсто. Имаме за 35 отсто помалку повредени лица на територија на СВР Скопје компарирано со претходните два месеци“, рече Тошовски.

Според него, овие параметри се во насока дека македонските граѓани знаат да препознаат добар проект, кој спасува човечки животи  и знаат да се однесуваат достоинствено доколку увидат дека се работи неселективно, посветено и професионално од институциите.

Тој најави дека граѓаните ќе имаат можност да платат на повеќе начини, во банка, да платат со картичка во најблиската полициска станица, преку електронски апликации на банките, а ќе има и посебна апликација, која ќе биде изготвена од МВР и ќе можат да ја користат граѓаните, со посебна заштита на корисникот.

Министерот Тошковски изрази жалење што јасно и гласно СДСМ не дале поддршка на овој проект и праша што правеле тие осум годинини наназад и не направиле ништо.