Иран е отворен за преговори ако САД исклучат воена акција

Висок ирански дипломат денес изјави дека неговата земја останува отворена за преговори за својата нуклеарна програма, под услов Соединетите Американски Држави да обезбедат гаранции што исклучуваат каква било воена акција против земјата.

Изјавата доаѓа откако американскиот интернет медиум Аксиос, повикувајќи се на два анонимни извори, објави дека претставникот на Белата куќа за Блискиот Исток, Стив Виткоф, планира да се сретне со министерот за надворешни работи и главен преговарач на Иран, Абас Арагчи, следната недела во Осло.

Ниту Техеран ниту Вашингтон не го потврдија извештајот на Аксиос, во кој се вели дека сè уште не е одреден точен датум за разговорите.

„Ние сме за дипломатија“, кажа иранскиот заменик министер за надворешни работи, Маџид Тахт Раванчи, во интервју за Ен-би-си њуз, додавајќи дека САД треба „да го убедат Иран дека нема да употреби воена сила додека преговара“.

„Ова е неопходно за нашите лидери да можат да одлучат за следната рунда преговори“, додаде тој.

САД и Иран разговараа за нуклеарната програма на Техеран кога Израел ги нападна нуклеарните објекти и воената инфраструктура на Иран на 13 јуни, пред САД да бомбардираат три нуклеарни објекти на 21 јуни.