ЕУ до 2040 ќе гради мрежа на брзи возови

Европската комисија денес претстави акциски план за брзи железници, кој ги утврдува чекорите за подобрување на прекуграничните и далечните патувања со воз низ Европа.

„Новиот акциски план за брзи железници ги утврдува чекорите што ни се потребни за да создадеме побрза, интероперабилна и подобро поврзана европска железничка мрежа до 2040 година“, кажа Рафаеле Фито, извршен потпретседател на Европската комисија.

Со завршувањето на брзите железнички врски меѓу главните градови на Европската Унија, патниците треба да добијат привлечна алтернатива на летовите на кратки релации и долготрајните патувања со автомобил.

Според проценките на Комисијата, завршувањето на планираната мрежа за брзи железници ТЕН-Т до 2040 година ќе бара инвестиции од околу 345 милијарди евра. Поамбициозна верзија на мрежата, со брзини далеку над 250 км/ч, би можела да достигне цена од 546 милијарди евра.

Ваквите инвестиции не можат да се финансираат само со јавни пари, предупредува Комисијата, па затоа ќе бидат потребни приватни инвестиции и заеми и гаранции од финансиски институции како што се Европската инвестициска банка (ЕИБ) и националните банки за развој.

Планот се темели на постојната трансевропска транспортна мрежа (ТЕН-Т), предвидувајќи поврзување на главните центри со брзина од 200 км/ч и повеќе.

Според проекциите на Комисијата, новата мрежа значително ќе го намали времето на патување низ Европа:

од Загреб до Будимпешта – 4 часа и 15 минути наместо сегашните 6 часа,

од Берлин до Копенхаген – 4 часа наместо 7,

од Софија до Атина – 6 часа наместо 13 часа и 40 минути.

Комесарот за одржлив транспорт и туризам Апостолос Цицикостас предупреди дека 12.000 километри брзи железници денес се концентрирани само во неколку земји-членки – Шпанија, Франција, Италија и Германија – додека Централна и Источна Европа се слабо поврзани.

„Тоа мора да се промени“, кажа Цицикостас.