Еве која риба е најдобра за здравјето на мозокот: Може да го забави неговото стареење
Квалитетниот сон, физичката активност, социјализацијата и менталните вежби, како што се решавање загатки или читање, значително влијаат на здравјето на мозокот. Сепак, исхраната игра клучна улога и во одржувањето на функцијата на мозокот, особено кога станува збор за внесот на омега-3 масни киселини.
Една од намирниците која се издвојува по благотворното дејство на мозокот се сардините. Според нутриционистот Меги Мун, сардините се богат извор на омега-3 масни киселини, кои се неопходни за оптимална функција на мозокот. Овие масни киселини ги подобруваат когнитивните функции и емоционалното здравје, а истовремено ги „чистат“ комуникациските канали во мозокот.
Порција од 85 грама конзервирана сардина содржи импресивни 837 милиграми омега-3 масни киселини и 21 грам протеин, што дополнително го поддржува производството на невротрансмитери – клучни хемиски гласници во мозокот.
Забавување на стареењето на мозокот
Стареењето често доведува до намален проток на крв и зголемено воспаление во мозокот, што може негативно да влијае на менталната функција. Омега-3 масните киселини, присутни во сардината, имаат способност да ги намалат воспалителните процеси и да ги поттикнат мозочните клетки да се регенерираат. Овие нутритивни компоненти помагаат да се врати штетата предизвикана од секојдневниот стрес.
Колку сардини се доволни?
Покрај омега-3 масните киселини, сардините се богати со калциум и железо – минерали кои директно влијаат на функциите на невроните и снабдувањето со кислород до мозокот. Експертите препорачуваат да јадете сардина или друга морска храна барем еднаш неделно.
Исхраната како диетата „Минд“, која вклучува сардини, покажа извонредни резултати во одржувањето на здравјето на мозокот. Истражувањата покажуваат дека оваа диета може да го забави стареењето на мозокот до 7,5 години и да го намали ризикот од Алцхајмерова болест за дури 53 проценти. Покрај рибата, оваа диета вклучува бобинки, јаткасти плодови и друга храна која ги поддржува функциите на мозокот.
Со внесување на сардини во вашата редовна исхрана, вие не само што придонесувате за зачувување на мозокот, туку и го намалувате ризикот од невродегенеративни болести.
